هوس الشهرة و الترندات

كتبت: نورهان مسعد

اغلب الترندات اللي ظهرت الفترة اللي فاتت كانت تافهة ومهينة للشخص اللي عمل الترند في مقابل الشهرة و إثارة الجدل حتى لو الترند دا هيجيب لي الاهانة، كلنا اكيد سمعنا عن المذيعة صاحبة لقب الفرعون الصغير و الصوت الشتوي و الصيفي و خد من ده كتير بقى، 

لو رجعنا شوية بالزمن كنا هنلاقي إن الشهرة مرتبطة بالنجاح، يعني المشهور مشهور عشان ناجح في مجال معين أو أخترع حاجة "مفيدة" للبشرية و في مقابل ده بيكسب شهرة و سُمعة كويسة بين الناس.

لكن انهاردة  مع ظهور السوشيال ميديا الشهرة بقت للي يعرف يستفز الناس اكتر،  هوس الناس ب "الترند" خلاهم يعملوا أي حاجة ويقولوا أي حاجة وييبعوا كل مبادئهم و كله عشان الفلوس، الكل بقي هدفه إزاى يحقق مشاهدات كتيرة من فيديوهات اليوتيوب و إزاى يكسب عدد أكبر من الفولورز على السوشيال ميديا.

السؤال هنا ليه ممكن إنسان المفروض إنه ناضج فكريًا و عاقل إنه يقول كلام مستفز وهو عارف إنه هيقلل من قيمته و ليه اصلا حاجة زي دي الناس تتفاعل معاها ؟ 

كل يومين بنسمع قصة جديدة عن بلوجر زعلت صاحبتها البلوجر التانية ف الناس تتطلع تتكلم عليهم ف عدد الفولورز يزيد عندهم ، هو دا سبب ظهور "الترند" الناس دي بتبقى كل فترة و التانية بيطلعوا بقصة جديدة عشان الناس تفتكرهم و محدش ينساهم حتى لو هما متفقين مع بعض كله يهون في سبيل الشهرة.

طب ليه احنا كمتفرجين بننشر الترندات دي و نخلي خبر تافه زي دا يطلع ترند ، لا وفي ناس كمان بيتعمل معاهم لقاء في برامج التلفزيون و الحوار بيكون إحكيلنا من الاول سِلفتك كانت مقموصة منك ليه !

الإجابة عزيزي القارئ لان احنا شعب بيعشق الاستفزاز و الفضايح يموت ف جلد الذات و المعاناة و الهبل.

ف احب اقول نصيحة لو انت صانع محتوى اتقي ربنا ف اللي بتنشروا للناس، الصح إنك تقدم حاجة مفيدة للناس، الصح إن يكون عندك مبادئ و قيم تخدم الناس.

ولو انت متفرج بلاش صباعك يبقى على اللايك و الشير على اي حاجة في وشك عشان منرجعش نزعل ونقول هي الناس التافهة دي بتتشهر ليه و تجيب فلوس بسبب شوية هبل "حرفيًا".