كتبت :- ابتسام حسن
اشتهرت في اسكندرية جملة اغلب الناس عرفاها و بتتقال بين الاسكندرانية و السياح كمان وهي " هو ده شعبان بتاع السمك اللي بيقولوا عليه ؟ " جملة طويلة وراها قصة نجاح مميزة جدا ، عشان كده تعالوا نرجع ب الزمن شوية لورا و تحديدا سنة 1917 م .
في منطقة معروفة في اسكندرية و مشهورة اسمها " المنشية " قريبة من محطة الرمل اتشهر وقتها واحد هناك اسمه " شعبان " واقف في الزواية بجانب فندق " كنال السويس " بعربية صغيرة جدا بيبع فيها سمك و معاه قلاية اللي ميزه وقتها أن السمك بتاعه مكنش مجمد ده كان طازج و السر الأكبر كان ف الخلطة أكل من عنده الإسكندرانية و السياح
لحد ما العربية دي بقت دكاكين كتير صغيرة جنب بعض في نفس المكان وهو ماشي ع نفس النظام يصطاد الفجر و يرجع يبيع السمك مقلي للناس لحد ما بقي اشهر بتاع اسماك في اسكندرية على الرغم من وجود افخر المطاعم ع البحر الا ان السر في الخلطة وطعمه المميز .
و مات شعبان و كمل مكانه أحفاده وبقى في فرعين مكانه الرئيسي القديم في المنشية و افخر مطعم موجود على البحر مكون من 3 ادوار بطول خط البحر ، وهما مكملين على نهج شعبان يتم بيع الأسماك طازجه و لما تخلص الكمية يتوقف المطعم عن تقديم الاكل للزبائن .
الغريب أن لحد دلوقتي المطعم مالوش منيو انت بتروح تطلب ع حسب احتياجك وموجود كل حاجة و الغريب اكتر أن أسعاره مش غالية و مناسب لجميع الفئات ، مميز بخلطته في السمك البوري المشوي و الجمبري و شوربة السي فود و شوربة الجمبري ، و يفضل الفرع الرئيسي القديم هو المحبب للزبائن و السياح عكس الفرع التاني ، ويفضل اسم شعبان اشهر المطاعم و متداول بين الناس حتى هذا الوقت .
تعليقات
إرسال تعليق