نتيجة الثانوية العامة

كتبت / منار السيد 

بما ان نتيجة الثانوية العامة خلاص على الأبواب تفتكر ابنك/ بنتك مستنين منك ايه في يوم زي ده؟

طبعا كلنا عارفين ان الثانوية العامة توتر ، و قلق سواء أثناء وجودها ، أو حتي بعد انتهائها بتفضل سايبه اثر للخوف ، و القلق ده جوانا .

و لأنها مرحلة تحديد مصير مش زي اي مرحلة دراسية مرينا بيها ، و مجرد بس ما نخلص امتحانات يبدأ يتنقل توتر الامتحانات لتوتر النتيجه ، و التفكير المستمر فيها ،وبمجرد ما يتقال أي تصريح إن ممكن تظهر في الوقت الفلاني البيت كله بيكون في حالة توتر وخوف .

و الفكرة هنا بقي اي ممكن يكون طالب الثانوية العامة مستنيه في الوقت ده ؟

هو بيكون مستني دعم و حب مستني تقبل من اللي حواليه له ولنتيجته مهما كانت، لازم كأهل يكون عندنا الوعي الكافي ؛ لأحتوائهم في الوقت ده و أننا فعلا نكون راضين بالنتيجة و مؤمنين بيهم ، و أنهم أبطال أنهم قدروا يتجاوزوا سنة دراسية متعبه بالشكل ده سواء حققوا المجموع اللي عايزينه أو لا ، و أننا بس مسئولين عن السعي ، و النتيجة بتكون تدبير من ربنا ، والأكيد اختيارات ربنا هتكون خير، مهما كانت نتيجتك ، نتيجتك مش مجرد رقم هيظهرلك في شهادة ، نتيجتك تعب و جهد و طاقة ربنا مش ممكن يضيعه أبدا، " إن الله لا يضيع اجر من احسن عملاً " ممكن حصاد جهدك يتأخر لكن بالتأكيد هتحصده ، وبالنسبة لجملة الثانوية العامة مش آخر العالم دي حقيقة ، مهما كانت صعوبة المرحلة فهي هتعدي و هتضيف لك خبرات هتخليك اقوي ، ربنا بيطلع الشمس كل يوم بعد ليل طويل ؛ عشان ياكد لك أن مهما استصعبت و اسودت هتنور من تاني ، مفيش كلية قمة انت اللي تقدر تكون قمة في مجالك باجتهادك و سعيك .

الثانوية العامة و نتيجتها ذكري بتكون محفورة جوا كل واحد فينا مر بالتجربة دي.

 أولادكم ممكن ينسوا المجموع ، أو الكليه بس الأكيد أنهم مش هينسوا حبكم ودعمكم ليهم في الوقت ده ، واتمني تحققوا كل اللي تتمنوه بجد .