ايه سر بهجة اعلان فودافون؟

كتبت- خلود أحمد

حياتنا عبارة  عن رحلة، والرحلة متحلاش الا بوجود سند حقيقي نقدر اننا نقول بيه.. حد يفتخر بنجاحنا ويزعل لما نفشل ف حاجة لأول مرة، بس يكون هو الكتف اللي بيقومنا وبيساعدنا اننا ننجح اكتر واكتر.. هو ده اعلان فودافون كان بيوصلنا مشاعر بسيط هادية صافية ونقية، بس اللي جَمل الإعلان هو ظهور أسرة العالمي" محمد صلاح" بس يترى بقى ايه السبب؟ 

بداية الإنسان بتكون عبارة عن مراحل معينة ولكل مرحلة من المراحل دي أوقات سهلة وصعبة.. وده  ينطبق على محمد صلاح.. مجرد شاب ريفي مصري كان عنده حلم بسيط وهو أنه يبقى لاعب كرة قدم مشهور وليه اسم وتاريخ ف مجال كرة القدم، بس عشان لكل حدوتة بداية بدايته كانت رفض ايوا العالمي صلاح اترفض لما قدم ف نادي الزمالك عشان ينضم ليه.. بس يترى ايه اللي حصل بعدين؟ 

محمد صلاح ميأسش حاول اكتر من مرة لغاية ما قدر يوصل للقب الفرعون المصري، قدر يحقق بطولات ف مصر وف أكبر اندية العالم، قدر إنه يكون قدوة لكل طفل عنده حلم.. بس دايماً الحدوتة مش بتكلم كدا وبس.. الحدوتة كانت فيها بنت بسيط حبت محمد صلاح وهو لسه ف بداية حياته، شجعته وسندته وفضلت جمبه برغم إنها مكنتش تعرف انه هيوصل للعالمية، هي فضلت معاه بقلب أم عايزة تشوف نجاح ابنها ف حاجة هو حب إنه يعملها، وده اللي قاله عمرو دياب ف الإعلان وهو" واقفة دايماً جمب مني.. شجعته صدقتني، سندتني موقعتش ف يوم"، ابسط مثال ووصف كُلي لزوجة محمد صلاح ووقفتها جمبه بس يترى ده بس الوصف.

عمرو دياب قال كوبليه ف الإعلان كفيل إنه يكون أرق وصف ليها.. " دي اللي جمبي من البداية خطوة خطوة كانت معايا دي ف سمايا ولا النجوم"، لو دورنا هنلاقي ان اهدى حاجة ف الحياة أن يكون حواليك حد فعلاً معاك خطوة بخطوة عارف تفاصيلك وحافظها.. فتخيل بقى أن في حد معاك فعلاً م البداية وانت بتبدأ كل حاجة يومك ورحلة حياتك ومشاكلك وكل حاجة.. بردو من رأيي ان في مغنى تاني نقدر نوصف بيه زوجة العالمي صلاح وهو "حمزة نمرة" خصوصاً لما قال " دنيا ودت ناس وجابت وانتِ ثابتة من البداية طول طريقي عليكي ساند مهما يحصل ايه معايا".

بس صلاح بردو كان اجمل مثال ع رد الحب ده خصوصاً إنه كان حابب ظهورها ف أي حاجة بتحصل معاه حابب يعرف الناس عن الهدية اللي ف حياتيه وعن مصدر قوته.. لما استلم الحذاء الذهبي صمم أنها اللي تستلمه عنه، ما أي ماتش ليه كان دايماً بيقوى بيها، ف تخيل لما يكون فيه روح حقيقية ظاهرة ف اعلان دى حاجة كفيلة أنها تخليك حابب وجود حد حواليك محارب انك تكمل معاه.

اصل مينفعش ننسى ان الحب اللي بجد هو أشيلك وتشيلنى.. هو انت ألاقي كتف فعلاً أي حد عليه، حد يكون ثابت معاك مهما الدنيا تخبط تفضلوا سوا.. امير عيد قال مرة" عشان كدا مقضينها سوا شد وخبط"، طبعاً الحياة فيها شد وخبط مشاكل ولحظات حلوة كفيلة أنها تحببك فيها.. بس هيفضل الونس ووجود حد جمبك يقويك ع أي حاجة انت بتمر بيها هو بالظبط عنوان حياتك الحقيقي.

ويظنون أن الحب مجرد لفظ ولكنه وجود روحاً تتماسك بنا لنعبر الحياة بسلام"