سن العشرين

كتبت : مريَم وليد صالح

مع كل موقف بنعدي بيه مهما بلغت مساوئه او إيجابيته ما هو فالأخر إلا تجربة بتضاف لصندوق خبرات بيزيد كل يوم وكل ثانية .. كدا كدا كلنا هنملي الصندوق بس مش كلنا هنستوعب المواقف أو نعرف نستخلص العِبرة منها ، مع الوقت هتكتشف أن خبراتك مش بس أنت اللي بتعملها بل من ورا معرفتك بفلان تجربة جديدة هتعلمك درس جديد ، عشان كدا عايزين نستغل المرحلة العشريناتية لملي صندوق تجارب مُحمل بالخبرات قادر يستوعب الجاي .

إيه الحاجات اللي المفروض تشغل تفكيري أول ما أدخل العشرين ؟؟؟!

كارير ، شريك حياة ، فلوس ، أصدقاء كتير ، شهرة ، إلخ ..

تعالي يا سيدي نتكلم في كام خطوة كدا نمشي عليهم من غير ما نضيع لذه المرحلة الشبابية :

- مبدأيا لازم تكون مدرك أن حياتك بالفعل بدأت يعني من أول ما دخلت العشرين وأنت طالع مفيش حاجة أسمها لما أكبر هعمل دا .. وصلت المستقبل خلاص فلازم تبدأ تتعامل من النقطة دي وإلا الانتظار هيأخرك كتير .

- لو قررت تحب لازم تتحمل وجع القلب ودي الضريبة المنطقية .. لازم تكون عارف ان الطريق مش شرط يكون سالك ومش معنى انه أول حب في العمر دا كافي انه يخليه يكمل .. عشان كدا لازم تكون مستعد ومتضيعش كتير في النقطة دي لأنها هتنتهي لكن أثرها طويل المدى .

- المذاكرة مش هتنتهي مع مشروع التخرج وكدا أنت براءة لو عايز تكون مميز لازم مخك يفضل يستقبل المعلومات في كافة الجوانب .. دا هيساعدك تكون على دراية اكتر باللي داير حواليك ودا سبب قوي للنجاح إن مكنش اهمهم .

- الخروج عن ال comfort zone ويمكن كل حاجة هتكون سبب في إنك تنجح لما تخرج من المنطقة دي .

- نقاط الضعف ، ومين فينا معندهوش نقطة ضعف؟! الفكرة إنها متأخركش .. ركز على النقطة القوية وطورها لأنها دي اللي تستاهل .

- لازم تقتنع انك مش سوبر هيرو .. مش هتقدر تعمل كل حاجة ومش هتعرف تكون موجود في الأوقات ومش هتقدر تحافظ على كل العلاقات عشان كدا لازم تختار إيه اللي يستحق وقتك بجد والباقي وقعه من الليست .

- كل حاجة شايفها تستاهل متتساهلش في إنك تحاول عشانها مرة وعشرة .

- مش كل ما تشتغل ويطلع عينك اكتر هتجيب فلوس أكتر ،  كل ما تشتغل بذكاء وحكمة .. أغنياء العالم بيشتغلوا وقت أقل .. الأهم من الشغل ، توظيفه في الإتجاه الصح .

- مفهوم الخوف من الخسارة مينفعش يكون في كتابك لأنه ببساطة هيخسرك متعة المغامرة .

- الروتين قاتل ودا بيكون نتيجة لخوفك من الخسارة في بيحبسك ف ال comfort zone اللي قولنا فوق انك مش هتكبر غير لو طلعت منها . 

- مش دايماً كل الناس واقفة على بابك مستنية أنها تساعدك لإن كل واحد وله طاقته وإمكانياته .. متنتظرش المساعدة غير من نفسك .

- خليك جاهز للظلم والقيل والقال عشان هتقابلهم كتير في حياتك من اقرب الناس قبل أبعدهم .

دروس حياتك مش هتخلص مجرد ما تتخطى مرحلة العشرينات بل هتكون لسه بتبدأ بناءاً على ما بنيته خلالها .. على قد ما هتعيش هتتعلم ، النقطة دايماً عندك هل هتقابل الدروس دي بالرضا ولا هتعتبرها نهاية محدش خسران فيها غيرك ؟!