تعالوا اقولكم طريقة الكبدة الاسكندراني  .. 

كتبت :- ابتسام حسن

ورقة وقلم يست الكل وركزي كده وتعالي اكتبي ورايا 

مقاديرك 

هتجيبي نص كيلو كبدة حتة كاملة 

كوباية صغيرة من الخل 

5 فصوص ثوم مفروم

2 قرن فلفل حار

كمون مطحون + كزبرة مطحونة 

ملح + فلفل اسود

رشة جوزة الطيب حسب رغبتك 

طبعا هيكون معانا زيت امال هنشوح الكبدة ازاي ؟

خلاص جهزتي المقادير ؟ تعالي بقا اقولك الطريقة 

في البداية هتجيبي الكبدة و تقطعيها شرايح صغيرة و تركنيها على جنب 

هتجيبي بقا طاسة حلوة كدة و هتحطي فيها شوية زيت بالنظر و هتنزلي بالثوم لحد ما لونه يتغير مش يتحرق ها 

هتكوني مقطعة الفلفل و هتحطيه معاهم وتقلبي شوية و تنزلي عليهم بكوباية الخل الصغيرة

هتاخدي الكبدة بقا و تحطيها معاهم وتقلبي لحد ما لون الكبدة يبقي رمادي هتحطي عليهم التوابل اللي هما ( كمون و كزبرة و ملح و فلفل اسود و رشة جوزة الطيب ) و اعتمدي هنا على التزوق بتاعك 

هتقلبي كويس جدا وبعدين هتحطي عليهم كمية مياه صغيرة جداً تكون سخنة و هتسبيها 5 دقائق أو لحد ما تبقي مستوية وبعدين تقدميها في سندوتشات أو مع مكرونة 

و بألف هنا عليكم .