ليه محمد فواد ابن البلد؟
كتبت-خلود أحمد
المطرب "محمد فؤاد" أو زي ما بنقول فؤش، أبن البلد، صوت مصر .. ودي ألقاب نجمنا اللي يعتبر موهبة جميلة جداً سواء ف الغنا ،أو التمثيل، أو تقديم البرامج، فؤش يعتبر من اجدر الفنانين اللي ظهروا ع الساحة الفنية ف التمانينات، صوته وإحساسه كانوا مختلفين.
فؤش من مواليد 20 ديسمبر 1961م، اتولد ف الإسماعيلية بس عاش معظم حياته ف احياء القاهرة مع أهله.. بس لو بصينا لأكتر حي عاش فيه هنلاقيه قضى٢٥ سنة من حياته ف حي عين شمس.
بدء فؤش حياته لما انضم لفرقة " فور إم" مع قائدها "عزت أبو عوف"، واللي جسد ف فيلم" إسماعيلية رايح جاي" شخصيته لما كان منضم لفرقة عزت أبو عوف، ومش بس كدا ده عمل أغاني مع الفرقة زي: سلطان زماني، ومغتربين.
بداية شهرة فؤش كانت بعد ألبوم" ف السكة"، ومن بعدها بدأت البومات فؤش تنتشر كان وقتها من ابرز نجوم جيله، بعد كدا بدء مشواره الفني خصوصاً ف مجال التمثيل .
قدر فؤش يخطف قلبنا بشاب بيغني عايش ع ذكريات مكانه القديم وحبيبة الطفولة كانت شخصيته كفيلة انها تجسد اسم الفيلم" غاوي حب"، وقتها افتكرنا معاه المكان اللي اتولد فيه حلمنا.
ومش بس كدا هو كمان اخدنا معاه رحلة اثبت فيها نفسه وحبه وده من شخصيته ف فيلم" رحلة حب" اللي كان يعتبر من افضل الأفلام لفؤش بالنسبالي، شخصيته كانت منقسمة بين طرفين أبهرنا فيهم سواء بحبه أو بسعيه عشان يبقى مطرب مشهور ف عصره.
موقفش عند كدا وبس فؤش عمل برنامج مقالب ف رمضان٢٠١٤، وكان اسمه " فؤش ف المعسكر"، غير مشاركته ف أفلام كتير اوى زي "امريكا شيكا بيكا، و هو في ايه!، و إسماعيلية رايح جاي" وغيرهم بردو .
وبردو مش هننسى مشاركته الجميلة ف مسلسل" أغلى من حياتي" اللي بردو كان من افضل مسلسلات فؤش بالنسبالي ووقتها نال شعبية كبيره من ناس كتير، وشارك بردو ف مسلسل الضاهر، ودعوة للحياة.
وهيفضل فؤش هو رمز للحنين والأصول مغلطش اللي سماه ابن البلد لأنه فعلاً من المغنيين اللي قدموا للبلد سواء أعمال تمثيلية أو ثروة فنية فادت ناس كتير وأهمهم أحبة فؤش.
تعليقات
إرسال تعليق