محمود الخطيب أيقونة كرة القدم
كتبت-خلود أحمد
محمود إبراهيم الخطيب ده بقى الاسم الكامل لكابتن " بيبو" أيقونة كرة القدم زمان، مش زمان أوي بس أصله لعب الأول ف نادي النصر بمصر الجديدة.. ولما بقى عنده ١٥ سنة اسمه اتكرر ف مجال كرة القدم خصوصاً إنه كان بيلعب ف دوري المدارس لكرة القدم.
طب " بيبو" كان اصلا عايش ف القاهرة؟
كابتن " بيبو" كان ف البداية عايش ف مركز السنبلاوين ف محافظة الدقهلية، بس عاش ف مصر مع أهله عشان يبدأ مستوى احترافه لكرة القدم .
بدأ "بيبو" الاحتراف صغير اوي خصوصاً إن نادي النصر اللي كان بيلعب فيه قرر إنه يوافق ع نقله للنادي الأهلي، مع انه كان خلاص هيوقع للنادي الاسماعيلي وكان وقتها عنده ١٦ سنة، عشان كدا لعب مع الفرق اللي تحت سن١٨ سنة واثبت مهارته العالية وقتها واللي زادت بالوقت والتدريب بردو.
أكتر حاجة اثبتت ان مهارته كانت بتتطور إن أول مباراة ليه كانت مع النادي اللي كان بيلعب فيه الأول" نادي النصر"، أما بقى ف١٥ اكتوبر سنة١٩٧٢م..صعد للفريق الأول عشان يلعب أولى مبارياته الرسمية أمام نادي البلاستيك، ف نفس المباراة سجل اول أهداف ليه، لحد ما أهدافه وصلت ل ١٠٨ هدف وده قبل وقت اعتزاله ع طول.
وكمان كابتن "بيبو" قضى حوالي ١٦ سنة من حياته مع الشياطين الحمر، وقضى ف لعب كرة القدم حوالى ١٧ سنة متصلة، فاز فيهم ب١٠ ألقاب دوري، و٥ كوؤس مصرية، وسجل ف المسابقات القارية ٣٧ هدفاً ف ٤٩ مباراة، ويعتبر عدد الأهداف ده عدد أهداف قياسي محدش عرف يتخطاه لحد دلوقتي.
وكمان"بيبو" حصل على ألقاب كتير اوي خلال مسيرته.. أولهم أفضل لاعب أفريقي سنة١٩٨٣، وكمان لقب هداف الدوري المصري الموسمي سنة ١٩٧٧،١٩٨٠، وكمان هو من ضمن أعضاء قائمة المائة ف الدوري المصري.
ومهما هنرجع ونفتكر كل بطولات وأهداف الكابتن المهاجم " بيبو" مش هتكفي للي قدمه من مهارات للنادي الأهلى واللي خلاه يبقى الرئيس الحالي للنادي الأهلي، ومش بس كدا فهو صاحب اعلى عدد أهداف محدش عرف يتجاوزه لحد الآن، وهيفضل " الخطيب" هو أيقونة كرة القدم ف مصر.
تعليقات
إرسال تعليق