في الثواني الأخيرة.. معلول ينقذ الأهلي ويصعد به لنصف نهائي كأس مصر

 مواهب من حقها تتشاف 

كتبت:نرنورة

كل حد فينا عنده موهبة  او يعرف حد عنده موهبة بتشوف أزاي بيكون مبسوط وهو بيتكلم عنها؟ طب بتشوف لمعة عينه وهو بيكلمك عن تفاصيل خاصة بيها ؟ أكيد صادفك الحظ في مرة وأتعرضت أنك تقعد مع حد موهوب ،عن نفسي بحب المسرح جدًا وبحب أوي أني أزوره وكل مرة بنبهر بكل التفاصيل والروح الحلوة الي بيضيفها الناس الي بتأخد الفرصة وبتقف عليه ودا الي حصل معايا لما روحت مسرح تربية وحضرت "دكتور ترانزيت" .

 

العرض عن نص " اعقل يا دكتور" للكاتب"لينين الرملي" والي عمله صياغة مسرحية يكون "عمر شريف" الحقيقة لما دخلوا في الأول يقدموا العرض وقالوا أنه بيقدم حاجة هادفة وقيم حسيت أنه هيكون ممل بالنسبة لمسرح كلية  بس لما بدء مقدرتش ابطل ضحك من خفة دمهم سواء بقا من طاهرة "نورهان أحمد" الي عليها ضحكه ترج المدرج كله وبتبعت بوسة في الهواء طول العرض لناس مجهولة والروج أهم حاجة في حياتها ،ولا صااااابر التمرجي "محمود عبدالغني " المشهور بتقيل الوزن لكن خفيف الظل وهو فعلًا يستحق اللقب وقد أيه هو كمان فتان وطماع بردو بس شهم الصراحة ميرضاش بالظلم لكن يرضى ب٥آلاف جني حق حباية الهلوسة عادي ،ولا من سقراط"حسام محمود"  .

أما بقا "حسام الدين أحمد" الشهير ب"أوباما" والي جسد دور مظلوم فهو كان ختامه مسك بالنسبالي وقدم دراما خفيفة جدًا على القلب قدام أحلام والي قامت بدورها "جيرمين طلعت" والي كلمة فنانة عليها شوية بجد أداء حركي وصوت وتعبيرات وشها والمفجأة كمان أنها طلعت بدورين مش بدور واحد وهي أشجان أخت أحلام ما احنا عرفنا أن الدكتور سعيد "حسام حميدو"  والي سميته بيني وبين نفسي دكتور عاطف الغلابة دكتور المصحة النفسية بيكتب مذكراته .  

 

احكيلكم الي شوفته؟ 

هحكيلكم 

دكتور وفيق "محمد سعيد " بيكون شريك سعيد في المستشفى وبتقع في إيده مذكراته سعيد وبيعرف منها انه بيحب أحلام ودا بيكون كارت قوي جدًا عشان يرميه قدام عصمت"روان نبيل" مرات دكتور سعيد الي وفيق بيحبها من زمان وحقيقي كل التقدير لأستاذ محمد سعيد الي خلاني أكرهه الشخصية وعاوزة أقوم أديله بالقلم على وشه عشان يبطل يبقا حربوء ويتلم شوية دا غير أنه زي ناس كتير في حياتنا يبان طيب وغلبان وبيحبنا وهو ماشاءالله عليه زي مبيقولوا السم في العسل  .

بالنسبة لعصمت فهي كمان بجد قد ايه ماشاءالله عليها مقنعة وأديت الدور حقه لدرجة أني كنت عاوزة أقولها اعملي فتة على كرامتك وأنزلي وزعيها كدا كتير أوي وكفاية ظلم ولا يعني عشان بباكي عنده سُلطة وبتاع أتقي الله شوية .

 

أما عن سقراط المثقف "حسام محمود" والشهير بكرستيانو بعد  

يعيني ما  أتصدرت كل كتبه أتجه للشحاته ولكنه كان فاشل فيها بس قدر يقنع الدكتور سعيد يشحت معاه ودا الي شوفناه في مشهد ودكتور سعيد بيحاول يسُبك التمثليه على وفيق وهو طالع شحات قدام المذيعة "سلوى أشرف" والمخرج "اندرو إيمن" . 

هتدور الأحداث بشكل كوميدي تتخلله الحكمة بس من غير متعيط أنتَ في الأول والأخر داخل تفك عن نفسك بردو ،وكل دا عشان يتم محتاج يكون تحت إدارة جامدة ودماغ مخرج شاطر فكل الدعم لأستاذ "عزت مصطفى" وأستاذ "حسين أحمد" مخرج مساعد وأستاذ إسلام البهلوان" مخرج تنفيذي ، وكيرلس برتي رئيس الفريق .

ممكن نتكلم عن كل أدوار المجانين الي في العرض نبدء مثلًا بشخصية سعرانة "مريم أحمد" والي كانت بتزوم على أي حد خلال العرض وبتعض أي حد واقف جنبها زي معضت مثلًا طاهرة، والي كمان ابهرتني أنا شخصيًا بطريقة تقليد اصوات الحيوانات ، أو مثلًا دور مرزوقة"رزان محمد" البنوتة السكره الي طول العرض بتمص في صوباعها ولازقة في شعرها توك بأشكال الكاندي وفي الأخر مسكت في دكتور وقالتله بابا بابا أنا بنتك يا بابا بصوت طفلة صغنون ولازم نحيها على الأداء العسل دا . 

ومثلًا  أستاذة مضروبة والميكب بتاعها كان مبين انها واخده علقه محترمه ودا كمان كان بيعكس تفاصيل عنها فخوفها الزايد من أي حد يقربلها وهكذا .

وأما عن الزعيم لأ مش عادل إمام دا "مصطفى رضوان " والي بيجسد دور مجنون بورسعيدي فاكر نفسه محامي وبيدافع عن البشرية كلها طبعًا اللهجة الي بيتكلم بيها وآداءه المسرحي يشهدوله أنه الزعيم القادم.

 

"احمد حامد " : بدور مبسوط ودا كان مبسوط طول المسرحية عادي وبيضحك بدون سبب لأنه بيتعامل مع ناس مش شايفينهم ومتبصلهوش بقا أحسن يسخسخ من الضحك . 

 .فارس بدوي بدور : القاضي وكان ليه هيبه والله حسيته قاضي بجد  

محمد عصام بدور : شيرين وهو شيرين اسمًا وصفة أكيد فهمتوا قصدي  

اندرو إيمن بدور : المخرج   

سلوي اشرف بدور : المذيعة والله يا استاذة سلوى مقدرة دورك جدًا لأني بعيش التفاصيل دي ديمًا فكنت بضحك على خيبتي بجد بس عاش ليكي جدًا .

وطبعًا منقدرش ننسى أن كل دا كان  تحت رعاية

‏‎ أ.د/ محمد أنور فراج : عميد كلية التربية جامعة الاسكندرية

‏‎ أ.د/ حسن عابدين: وكيل الكلية لشئون التعليم والطلاب

مدير عام الكلية :أ /عزيزة شلبي. 

مدير الرعاية: أ/شريف شوقي 

مشرف اللجنة الفنية: أ/هيثم إبراهيم 

إعداد/عمر شريف