في الثواني الأخيرة.. معلول ينقذ الأهلي ويصعد به لنصف نهائي كأس مصر

 تراماواي

كتبت رؤية وائل 

قررت النهاردة اكتب عن حاجه انا بحبها جدا و بعتز بيها جدا وهي الترام.

اه الترام

يمكن حاجه مش كثير يعرفها او مركبهاش بس احب اقولك انك مجرد ما تجرب وتسمح للترام  انه ياخذك في رحلة من احلى الرحلات اللي ممكن تعيشها في اسكندرية صدقني مش هتبطل تركبه.

أول ظهور للترام كان في معرض شيكاغو الدولي عام 1883.

طب وايه اللي يشدني اني اركب الترام!

بص يا سيدي هو بياخدك في رحلة داخل حواري اسكندرية المشهورة، وعلى مهله كمان يعني بيديك فرصة انك تقف في كل محطة وتستمتع بيها، وبنصحك انك لو متأخر على معادك بلاش تركبه لان الترام بتاعنا بيحب يمشي على مهله حبتين.

شفت انت الاسعار اللي عمالة تزيد وتزيد دي والبنزين اللي عمال يغلى وكل شوية تدفعلك ربع جنيه زيادة على فلوس المواصلات لحد ما توصل 20 جنيه مواصلات في اليوم..

لا يا سيدي بقى الترام بيقدملك خدمة حلوة وموفرة جدا تروح وترجع بيتك ب 2 جنيه بس جنيه رايح وجنيه راجع وهتقعد كمان براحتك و تتفرج من الشباك على محطات اسكندرية اللي هتذهلك بجمالها .

تجربة تراماوية..《قصة فتاة عشرينية مستوحاة من الواقع》

تيك.. توك..تيك.. توك.. لسه الترام مجاش مش مشكله هستناه في المحطة هتسلي بقراءة روايتي.. 

بعد 10 دقائق..اخيرا يا عم اتأخرت عل.. يووه ده مش بدورين!

لا هستنى اللي بدورين لسة معايا وقت ..

"وابو دورين ده بقى احلى واحد ممكن تركبه بيكون فاضي وبتقعد براحتك كمان لما تبص من الشباك من فوق وهو ماشي تحس انك راكب طيارة"

 اهو.. يلا بينا

طبعا طلعت الحق مكاني المميز قبل ما حد ياخده اوهو لحقته..

 اكمل روايتي بقى قبل ما تبدأ رحلتنا..

 بعد آخر كلمة في الفصل 17.. صوت ابواب الترام بتتقفل "تراخخ"  خلاص اهو بيتحرك نعلي بقى فيروز عشان تغطي شوية على صوت حركة التراب لأنها مزعجة حبتين.

اه منسيتش الشاي بالنعناع بتاعي طبعا بحب اشربه مع فيروز والترام

يجي عم الكمسري بصوته المزعج ده وهو بيخبط بالجنيه على كراسي الترام عشان يعرفك انه جاي وعارف انك ما دفعتش وهيجيبك وشايفك؛ فتحضر له الجنيه بتاعك بسرعة عشان ما ميجيش يعد يستنى حضرتك.

خلصت ! 

لا مخلصتش..

"ما بقاش في تعليم ولا تربية العيل من دول عايز فلوس وخلاص عشان ساعة بلاي ستيشن ولا خروجة مع اصحابه ول البنت عشان تجيب ميك اب وهدوم ويوم ما تقوليلهم شوفوا مستقبلكم واشتغلوا يعملوا نفسهم مش سامعين…مكناش زمان كده ياختي اه.. يلا ربنا يهديهم" 

وتبصلي والاقي نفسي اتحشرت ما بين طنط ام نظاره وطقم أسنان وطنط ام شال روز وكحكاية في شعرها بس مجرد ما واحده فيهم تنزل..

ايه فكرني هقول لك التانية هتسكت!!

لا بتتعرف على اللي جنبها وتحكي في حوار تاني.

 

جميله طنط ابتهال اللي نقراني من جزمتى لحد دبوس طرحتي دي ناقص شوية وتقولي ابني محمد جاهز من مجاميعه..عندك كام سنة يا عروسه!؟

 "مشط ب 2 جنيه.. كابل شحن ب 10 جنيه.. ٣ شيكولاتات ب 5 جنيه.. وبص على تاريخ الصلاحية.. أسعار مش هتلاقيها في سوق بكسب جنيه وبقول الحمد لله"

وتلاقي الحاجة محطوطه في حجرك عشان تغريك فتشتري.

 يا ترى محطة الجامعة فاضلها قد ايه!

"عمو سواق الترام حاططلنا خريطة كده الترام بيمشي عليها والمحطات بالترتيب عشان تساعدنا نعرف احنا فين"

هانت فاضل محطتين..

ابدأ اجهز حاجتي واشيل كتابي وسمعتي في شنطتي واقف على الباب استنى محطتي.

وصلت اخيرا.. سلاااام…واضح ان اصحابي العواجيز بتوع الترام بقو أكتر من اصحابي بتوع الكليه.