ايه البيميز باند كايروكي

بقلم :- محمد مسعد

 باند كايروكي هي باند بدأت سنة 2003 ومكونة من 5 اعضاء وهما امير عيد ,تامر هشام , شريف هواري , شريف مصطفى , آدم الآلفي ولكن انا انهاردة مش جاي اتكلم عن قصتهم لا خالص الموضوع ده اتكلموا فيه كتير وهتلاقوا معلومات كتير عنه عالنت لكن انا انهاردة جاي اعمل حاجة مختلفة تمامًا انا جاي اتكلم عن الباند اللي انا بيج فان ليها من اكتر من 10 سنين جاي اتكلم من وجهه نظر عايز يقول ايه البيميز الناس ديه عن اي حد تاني بيقدم مزيكا جاي اقول ايه هو سر حبي فكايركي وليه هي الباند المفضل ليا

كايروكي اكبر سبب لحبي ليهم هوا شغفهم للمزيكا وطبعًا حد هيسألني يعني ايه ده اصلا هقولك يعني أن شغف الناس ديه بيبان فشغلهم كويس اوي وعلى فكرة فشغل اي حد الشئ اصلا اللي بيفرق بين ناجح وفاشل هوا شغفه في عمله وشغفه لتقديم فن مش مجرد شوية اغاني تنزل عشان يكسبوا منهم ويعملوا لنفسهم كام حفلة لا كايروكي مختلفين تمامًا فالنقطة ديه عن ناس كتير لأن مع كل اغنية هما بيقدموها انا بحس بشغفهم والكلام ده من زمان وده بيظهر على اكتر من هيئة طيب بمعنى ايه أننا دلوقتي لما بنشوف شغل الناس ديه بنلاقي انهم من ايام الثورة وهما بيتجددوا في اعمالهم و بيهتموا جدًا بكلماتهم وانها تكون كلمات بتلمسنا كشباب وبتلمس فكرنا 

لو بصينا مثلا على 2011 ايام الثورة هما مكانوش مجرد باند بتحاول تنجح بسبب الثورة لا هما كانوا شباب عندهم شغف انهم يوقولوا حاجة ويبقى كلامهم مسموع وليه صدى وبالفعل كايروكي نجحوا فده وبشكل كبير جدًا ولما الثورة انتهت بدأوا يقدموا اغاني بتلمسنا كشباب وبتلمس افكارنا حرفيًا قدموا اغاني بتقول الاحنا حاسين بيه ومش عارفين نقوله فمثلا نبص على اغنية غمض عينك وبالذات اخر دقيقة اللي فيها امير عيد بيغني بإيقاع سريع وبيقول كلام حرفيًا من اجمل كلام الباند 

" اول ماتنجح هتلاقي كلاب بتنبتبح والفاضي هيعمل قاضي وبخياله يسرح اوعى تدخل معاه الحرب عمرك شفت حد بيعض كلب"

وديه مثال على مهارة كايروكي فالكتابة على فكرة قدروا يعبروا عن نقطة الناس البتحاول تحبط بيك وقدموا مثال وكل كده في إطار مرح وممتع والفاظ سهلة علينا وديه مش اول ولا اخر مرة يعملوا حاجة زي كده عندنا واحدة مثلا من اجمل بارات اغاني كايروكي

 مهما ترسم عالحيطان الف باب لسه الحيطان حيطان والرسمة باب كداب مهما تفرش طريق آخره لامع بالآضواء يفيد بأيه النور لما يكون سراب

وديه حقيقة مهما حاولنا نخدع نفسنا بأمل كاذب الأمل الكاذب ده مش هيتغير والوهم هيفضل ثابت مش هيتغير فمينفعش نتعشم فأكاذيب عملناها فدماغنا لأن الحياة مش بتمشي على اللي فدماغنا بل بالعكس الحياة بتمشي على البيحصل فالواقع ولازم عشان نعيش صح نتكيف مع الواقف اللي حوالينا مش الوهم اللي عشناه فعقلنا لأن زي ما قالوا مهما رسمنا عالحيطان الف باب لسه الحيطان حيطان والرسمة باب كداب

وغير كده كايروكي لو بصينا على نوعية المزيكا البيقدموها فهي متجددة ومتنوعة جدًا ومش بيثبتوا على شكل ثابت يعني مثلا هتلاقي شعبي وهتلاقي حماسي وهتلاقي رومانسي وهتلاقي حزين فالحقيقة هما باند مهما كان موودك هتلاقي ليهم حاجة تليق عليه ده غير أن هما حاليًا بدأوا يتوجههوا لطريق الدراما وبشكل حلو جدًا مش مجرد تقديم عمل درامي للفلوس لا تمامًا هما قدموا ريفو الموسم الاول واللي عجب الناس بشكل كبير وحاليًا شغالين على الموسم التاني من المسلسل فده برده شئ كويس جدًا 

ده غير آخر أعمالهم وهي آلبوم روما اللي نزل في سبتمبر 2022 انا الحقيقة من اقوى المعجبين بالآلبوم ده وبكمية التنوع اللي فيه ولكن لو هنتكلم عن أجمل اغنية في الآلبوم هتكون بالنسبة ليا هي اغنية روما

وأجمل جزء في هي 

اتولدت في ضلمة وطلعت شمعة ممكن ابقى نور وممكن ابقى ولعة الدنيا اختبار واحنا زي النار هننور ولا هنحرق احنا اللي بنختار

رسالة الباند هنا هي أن حياتنا بتحدد بقرارتنا وبتتشكل على اساسها فالآختيار فآيدينا احنا انهي مسار هناخده وفي عز شدة اختبارات الحياة هيكون ايه قرارنا