كتبت: بسملة محمود حسن
بقولك يا صاحبي سمعت عن الافروسنتريك؟
_الافرو... ايه؟!!
شاي في الخمسينة وتعالى احكيلك.
___
دي حركة عملوها سكان أفريقيا ضد سكان مصر الحاليين، بحجة إن الحضارة الفرعونية بتاعتهم.
طب ليه؟
أقولك أنا،
طبعًا كلنا عارفين إن القارة الافريقية تُلقب بالقارة السمراء، بحكم موقعها الجغرافي القريب لخط الإستواء.
هتقولي إيه الفايدة، هقولك اتقل شوية
زمان في الدول القديمة ككل كانوا بيستعبدوا ذوات البشرة الغامقة، زي الدولة الفرعونية القديمة، وباقي الدول العربية والاجنبية القديمه، واللي لسه سايبة مخلفات داخل أكثر من شخص إن ذوات البشرة الغامقة لازالو عبيد، وده اللي مسبب أغلب حركات التنمر اللي طالت ذوات البشرة الغامقة.
في اللي بيقولك إن اما حقوق الانسان اعطت حق الحريه لذوات البشرة السوداء كانوا لسه حاسين انهم محتلين، ليه؟!
لانهم لقوا إنهم لازالو محتلين فكريا وثقافيا، عشان معندهمش حضارة وتاريخ وثقافة خاصة بيهم.
فيعملوا ايه؟!
نسبوا أغلب الحضارات الإفريقيه والأوربيه والأسيوية ليهم.
_الاوربين ذوات البشرة البيضاء اللي باني حضارتهم أفارقة؟؟
تخيل يبني الدماغ شغاله ازاى، ودي حاجة بدأت من القرن التاسع عشر، بعد ما قولنا إنهم حسوا إنهم لسه محتلين فكريًا وثقافيًا، مش عارفين مين اجدادهم، إيه جذورهم، إيه اصلهم، حاجه آخر توهان ولفي بينا يا دنيا.
عشان يعملوا إنهم أقوياء قدام الأمريكان او الغرب عموما كانوا عايزين ستارة قوة يستخبوا وراها حتي لو مزيفة، وقع الإختيار علي الحضارة المصرية، لأنها تعتبر من أعظم الحضارات الأفريقية.
_طب إيه ساعدهم في ده، او إيه حجتهم؟!
اقولك أنا، حجتهم إن المصريين ذوات بشرة بيضاء او حنطية او خمريه، بشرة المصرين كل الألوان عدا البشرة السوداء اللي موجودة بقله عند المصرين، فبيقولوا ايه، إن المصريين الحالين ما هما إلا محتلين وغزاة سابقين وإن اصل كل حاجة على أرض مصر هي ليهم.
_دي حجه اطفال عايزين يتهربوا من المذاكرة، ومين صدقهم بقى؟!
اللي صدقهم وساعدهم هو اللي عايز ينهي فكرة إن المصريين أصحاب حضارة 7000 سنه وإن الفراعنه هم أجدادهم، رغم إحتلال الدول الاسيوية والأوربية لمصر إلا أنها لازالت محتفظة بلغتها العربية الأصلية عكس دول كتير وكمان لازالت مصر محافظة على هويتها اللي علمتها لكل محتل في حين ان ولا محتل قدر يعلمنا هويته ولا اللغة بتاعته.
_اه، عشان كده الناس متضايقة من فيلم كيلوباترا بتاع نتفليكس؟
كده بدأت تصحصح معايا، طبعا معروف ان كيلوباترا جدها الاكبر يكون الاسكندر الاكبر اللي هو اصله يوناني، واديك شايف اليونانين بياض وجمال مفيش بعده، يبقى إزاى اصلها يوناني وتطلع مش خمرية حتي لا دي سمراء سمراء يعني، ده للناس اللي بتكسل تبحث وللأفارقة اللي عايزين اي مساعده عشان ياخدوا ارضنا يثبت بطريقة حتي لو غير مباشرة إن فعلًا الحضارة المصرية أصلها افريقي وما إحنا غير شوية محتلين.
_طب ما في مصريين سُمر يمكن كيلوباترا منهم، ليه لا؟
أقولك ليه لا، أغلب المصرين ذوات البشرة السمراء موجودين في جنوب صعيد مصر، في حين إن كيلوباترا اغلب فترة حكمها بعيد عن المناطق دي، دا غير أصلها وجيناتها، يعني أضعف الإيمان تكون خمرية او قمحية حتى.
_طب يمكن مكنش عندهم الوان زمان عشان كده معرفوش يلونوا وشوش التماثيل للأسود؟
كان نفسي اطبل وراك والله، بس زمان المصريين القدماء كان عندهم الوان، زي الازرق والاسود والبني المحمر وغيرهم، وكان كل لون له استخدمات في رسم لوحات المعابد.
_طب مش يمكن هما أصحاب الحضارة دي فعلا؟
اقولك مستحيل ليه، لأن لو هما أصل الحضارة معنى كده إن الدولة كلها كانت سمراء زمان، طب ازاي وفي حذاء للملك توت عنخ امون راسم عليه ناس ذوات بشرة سوداء، ودا علامه علي تذليلهم له، يعني بالعقل لو توت عنخ امون كان أسمر هيرسم نفسه علي حذائه ليه؟؟
_طب ايه سبب ان المصريين مش سمر زي الباقي؟
مصر مع الاحتلال تصاهرت مع المحتلين وبقوا نسايب وده بيديلك سبب إن في بعض المصريين تحسهم اجانب، لكن دول اقليه الاغلبية الوان بشرتهم تتراوح بين القمحيه والخمرية، وبرضو المغرب والجزائر، معانا في قارة افريقيا بس مش سمر.
_كنت لسه هسأل، يعني ليه من دونهم كلهم عايزين يخرجوا المصريين، قصتك ناقصه يا هانم!!
مين قال انهم عايزين يخرجوا المصريين بس، حتي عايزين يخرجوا الجزائريين والمغاربة، وبرضو بيقولوا عليهم محتلين وغزاة.
_هو كله محتلين وغزاة؟
بالنسبالهم اه، وبالنسبالهم انهم أصحاب الأرض الحقيقين.
_اسرائيل مود يعني؟!
الله ينور عليك، برضو هما بيقولوا ان الفلسطينين احتلوا ارضهم وانهم هما اصحاب الأرض الحقيقين، عرفت بقي ايه ومين هما الافروسنتريك؟
ملحوظه*
مفيش اطيب من الناس ذوات البشرة السمراء اصحاب القلب الابيض وكامل حبي واحترامي ليهم، اما ذوات القلب الاسود لا سلام ولا مسا
.jpg)
تعليقات
إرسال تعليق