تفتكر طفلك محتاج ايه؟؟

بقلم/ منار السيد

سؤال محتاجين نفكر نفسنا به باستمرار ايه هي احتياجات أطفالنا غير أكل و تعليم و لبس؟

خلينا في الأول نتكلم عن كونك انجبت طفل فايه هو دورك في حياته؟  هل دورك في حياته هو انك تلبى احتياجاته الظاهرة بس ؟ 

لو ده مفهومك عن التربية فاحب اقولك يا عزيزي انه غلط .

في البداية ربنا رزقك بطفل فأنت دلوقتى بقيت مسئول مسئولية كاملة عن حياة إنسان جديد ، و بتبدأ مسئوليتك بداية من انك توفره له متطلباته الأساسية اللي هي جزء من احتياجاته بس لازم تكون عارف أنها مش كل احتياجاته.

 فمثلا على سبيل الدراسة ممكن نسمع من أهالي كتير جملة انت عندك كل حاجة ليه ممكن درجاتك متكنش أعلى من فلان ؟

ودى جملة كافية أنها تحطم نفسية ابنك او بنتك وهنا لازم نقف عند نقطة مهمة جدا وهي "المقارنة" يمكن الاهل بيكونوا شايفين أن مقارنتك مع حد ممكن تحفزك ، وأنها هتكون نقطة انطلاقك عشان تثبت العكس ، وأنك قد ايه هتكون شاطر ، أو بمعنى أصح اشطر من فلان مع ان ممكن فلان ده يكون شاطر في الدراسة بس معندوش نفس التفوق ده في الرياضة مثلا وده لاننا مختلفين ، لازم نكون مدركين أن المقارنة هنا هتزرع في عقل الطفل أن تفوقه مرهون بالمقارنة يعنى مش هيذاكر عشان هو محتاج يكون أحسن أو يثبت نفسه هو هيذاكر لمجرد انه يكون في مستوى الشخص اللي بيتقارن به طفلك.

والحقيقة أن طفلك مش محتاج يتقارن او انك تهز ثقته بنفسه ، طفلك محتاج انك بدل ما تقارنه تساعده وتدعمه ، وأنه لو مش كويس في مكان تدور معاه على المكان الصح اللي هيقدر يثبت فيه نفسه ، طفلك محتاج انك تسمعه اكتر من انك تنصحه لازم تفتكر ان كل واحد فينا محتاج انه يخوض التجربة بنفسه عشان يتعلم من اخطائه ، علمه أنه يتحمل نتائج اختياراته مهما كانت صعبة عشان يعرف يختار الصح ، طفلك محتاج انه ميكنش في صراع مع حد محتاج انه يكون بيعمل الحاجه عشان نفسه قبل اي حد ، وانه لازم يتعلم و يغلط وأن مفيش حد مثالي ، وكلنا عندنا أخطاء لكن المهم ازاى منكررش أخطائنا ونتعلم منها ، طفلك محتاج يتعلم و يشتغل على نفسه من غير ما يحس انه مرهون بمقارنة في النهاية وانها هي اللي هتحدد شكل حياته واد ايه هو ناجح أو لا ، انت محتاج تحفزه بس بالطريقة الصح بالطريقة اللي هتخليه كل مرة يلجأ لك عشان تكون جمبه وتساعده انه يتغلب على مشاكله و يشاركك محاولاته. 

انصحه وعرفه ان مفيش حد خالي من الاخطاء و يمكن معظمنا كان بيسمع في الأفلام أو المسلسلات زمان من الأهل " انا كنت دايما بطلع الاول" على سبيل التحفيز و لو حتى كانت مش حقيقة بس بتتقال بحجة انك عايز طبعا ابنك او بنتك يكونوا احسن بس ده مش صح .

بلاش نزرع جواهم كلام ممكن يهز ثقتهم في نفسهم وأنهم لو مكنوش زيك كقدوة ليهم هيكونوا مش ناجحين لازم نؤمن بفكرة أن كل شخص ربنا رزقه هبه وهي انه هيكون ناجح في مجال ما لان ربنا مخلقناش كلنا زي بعض وان حكمة ربنا هي التنوع و الاختلاف يعنى مش لازم الدكتور إبنه يكون دكتور زيه باختصار اهتماماتنا مختلفة ونظرتنا للأشياء كمان مختلفة وده اللى لازم نعلمه لأطفالنا ، وأن لو حد ناجح في مجال عكسنا مش معناه اننا نحس بالفشل ، انما محتاجين ندور جوانا على المكان اللى هنلاقى نفسنا احنا كمان ناجحين فيه .طفلك دايما محتاج حبك واهتمامك ودعمك له في كل وقت اكتر من كونه محتاج لعب او لبس او أي حاجة تانية. وافتكر دايما انك موصلتش لنضجك و خبراتك اللي انت فيها دلوقتى إلا بعد ما مريت بالغلط واتعلمت منه .