كتبت: نورهان مسعد
مرض البارانويا هو اضطراب نفسي بيحس المريض فيه أنه دايمًا مُعرض للتهديد و الخطر و إن كل الناس عايزة تأذيه ودايمًا عايش دور الضحية.
ايه أهم معايير التشخيص و الأعراض؟
١/ دايمًا عنده سوء ظن غير مبرر إن الشخص اللي قدامه ده هينصب عليه أو هيستغله أو هيأذيه.
٢/ دايمًا بيشك في إخلاص صحابه و أهله لي.
٣/ دايمًا بيبقى شايف تصرفات الناس العادية إن هي وراها حاجة ؛ بمعنى لو الشخص ده بيعاملني حلو أو بيقدملي خدمة يبقى اكيد ورا المعاملة دي مؤامرة او اكيد هيطلب مني حاجة مقابل الخدمة دي.
٤/ ممكن يكره حد بسبب تافه جدًا.
٥/ لو المريض بيكون في علاقة أو مرتبط دايمًا بيشك في شريكه بسبب ومن غير سبب.
٦/ دايمًا بيكون رد فعله على أي حاجة بعصبية لأنه بيكون متوهم إن الناس كانت بتجيب في سيرته بالوحش.
طب ايه اللي يخلي الشخص يفكر كدا أو ايه هي أسباب المرض؟
مرض الإرتياب ملهوش اسباب معينة بس في عوامل بتحفزه، زي:
- إن الشخص يكون اتعرض لصدمة وهو في سن صغير.
- إن الشخص يكون بيتعرض لضغط نفسي و عصبي كبير.
- عوامل جينية وراثية.
طيب وفي علاج للبارانويا؟!
مرض البارانويا ملهوش علاج كيميائي بس لي علاج نفسي و سلوكي، بيتم فيه تعزيز ثقة المريض بنفسه و ثقته في اللي حواليه، و بيتعلم ازاي يتحكم في مشاعره و يعبر عنها بطريقة صح.
لو حسيت إن عندك الأعراض دي أنصحك تزور طبيب نفسي يشخصك🤍.
ملحوظة: المرض النفسي مش عيب ولا عار هو مرض زيه زي الانفلونزا بتحتاج دكتور في الحالتين عشان يديك علاج مناسب لحالتك.
تعليقات
إرسال تعليق