يلا نتعرف على التنمر

 كتبت: بسملة محمود حسن

صباح الخير. 

_بهدلوني وهزقوني. 

دي صباح النور بتاعتك؟! 

_قالوا عليا يا قصير يا ابو نضارة يا ابو كرش. 

دا تنمر لفظي وقلة ذوق. 

_قوليلهم و.... قولتي تنمر ايه يختي؟! 

لفظي. 

_علي اساس في تنمر غير اللفظي؟! 

لا دا أنت تجيب الشاي بتاعنا وتيجي ورايا بقي. 

____

بص يا سيدي، تعريف التنمر معروف بس هعرفهولك بزيادة عشان التكرار بيعلم الشطار، التنمر هو سلوك عدواني متكرر يهدف للإضرار بشخص آخر عمداً، جسديا أو نفسيا.

 يتميز التنمر بتصرف فردي بطرق معينة من أجل اكتساب السلطة على حساب شخص آخر.

_ايوة، صح، حصل...، انزلي بالترجمه اثابك الله. 

يعني مثلا، صحابك اللي بيقولوا عنك قصير، اولا هما عارفين إنك بتضايق من ده أكيد، فبيعملوا كده علي طول اما يحبوا يعصبوك، وتكرار ده ممكن يسببلك مشاكل جسديه زي مثلا إنك تلجأ لرياضه تساعد في إنك تطول وتجهد نفسك عشان تطول او الطريق الدوائي اللي مبيخلاش من الاثار الجانبية للادوية المخصوصه بالحاجات دي، وممكن يسببلك مشاكل نفسيه وهي إنك متحبش نفسك وتحس انك اقل من اي حد وتحاول تتجنب الناس خوفا من انهم يعيدوا نفس الكلام. 

_طب واكتساب السلطة، سلطة ايه اللي هتتاخد من ورا التنمر مثلا؟ 

انه يبان بالبلدي الواد الروش، او البنت الجامده بقي اللي مفيهاش عيب لدرجه انها بتنظر علي عيوب غيرها. 

_سلطة مجتمعيه صداقيه يعني. 

الله ينور عليك. 

_انا كنت فاكر سلطه تانيه. 

لا تانيه ولا تالته، عدي المقال معايا عشان منروحش باي. 

_طب دا التعريف، ايه الانواع بقي اللي قولتي عليها؟ 

اليونيسف يا سيدي بيقولك ان انواع التنمر خمسه: 

 بدني: الضرب، أو سرقة وإتلاف الأغراض.

لفظي: الشتائم، والتحقير، والسخرية، وإطلاق الألقاب، والتهديد.

اجتماعي: تجاهل أو إهمال الشخص بطريقة متعمدة، أو استبعاده، أو نشر شائعات تخصه.

نفسي: النظرات السيئة، والتربص، التلاعب وإشعار الشخص بأن التنمر من نسج خياله(يعني انت اللي بتتخيل انهم بيتنمروا عليك، لكن هما نيتهم سليمه) 

إلكتروني: السخرية والتهديد عن طريق الإنترنت عبر الرسائل الإلكترونية، أو الرسائل النصية، أو المواقع الخاصة بشبكات التواصل الاجتماعي، أو يتم اختراق الحساب.

_ايه ده كله؟! 

اومال انت فاكر الموضوع بسيط؟! 

التنمر حسب احصائيات مركز دراسة الامراض بيكون سبب في وفاة ما يقارب 45000 شخص سنويا اغلبهم ان مكنش كلهم وفاتهم سببها الانتحار، حيث ان من كل 100 محاولة فاشلة محاولة ناجحه علي الاقل، ودا رقم يمكن يكون بسيط دلوقتي لكن لو كبر هتبقي مصيبه، وبيقولك ان حوالي 14٪ من طلاب المدارس الثانويه بيفكروا في الانتحار، دا غير ان في 7٪ منهم بيحاولوا الانتحار فعلا، يعني نسبه اللي بينفذوا من اللي بيفكروا مش قليله، ودا رقم مرعب، دا غير ان في حوالي 160000 طفل بيفضلوا في البيت ومش بيروحوا المدرسه يوميا خوفا إن حد يتنمر عليهم. 

_دي حاجه صعبه فعلاً، طب هما بيكسبوا المتنمرين؟ 

المتنمر بيداري نقصه بتسليط الضوء علي عيوب غيره، عشان محدش يركز علي عيوبه هو ويطلعوه علي المسرح زي ما هو بيعمل معاهم. 

_طب سؤال، المتنمر جاني ولا مجني عليه؟ 

الاجابة جميع مع سبق، اولا هو جاني، جاني علي نفسه انه بيخلي الناس تقطع علاقتها بيه ومتحبش وجوده، وجاني علي اللي حواليه عشان بيحسسهم بمشاكلهم او بيسلط الضوء علي عيب فيهم هما بيحبوا الناس تتكلم عليه، عشان مش كل الناس عندهم الشجاعه والثقه بالنفس، ساعتها بتتهز ثقتهم بنفسهم. 

_طب وازاي مجني عليه؟ 

انه هو شخصيا ممكن يكون ضحيه تربية غير سويه من اهل شايفين ان شروط الجمال محدودة، أو ان النقاش بيتم بطريقه غير حضارية، زي ما اغلب الاهل اما يلاقوا اولادهم بيعارضوا رأيهم فيقولوا لهم انتم مش نافعين أو انتم تعرفوا ايه في الدنيا، ويكسروا مقاديفهم بالبلدي، فـده بيكون مبرر للمتنمر انه يطلع اللي حصله علي غيره، واي حد يخالفه الرأي يبقي مش بيفهم، بيبقي معندهمش فكره يا تقنعني يا اقنعك، لأ بتبقي يا اقنعك يا اهزقك واقل منك، او يكون هو في يوم من الايام كان ضحيه تنمر من شخص وقح فـده كان سبب انه ينتهج التنمر عشان يحمي نفسه، او يكون ضمن شله اروش واحد فيهم متنمر فـيكون عايز انه يبقي روش زيه وساعتها بيبقي متنمر. 

_بتبرري للتنمر؟ 

لا حاشا وكلا، الافعال اللي من النوع ده ملهاش مبرر ايا كانت ظروف اللي بيعملها، انا بس بجاوب علي سؤال هو مجني ولا جاني. 

_والتعامل معاه ازاي؟ 

تتجاهله وتبعد عن المواضيع اللي ممكن يحولها لتنمر، او ممكن تحاول تسكته بس بشياكه مش وقاحه زيه، وكمان متخليش الظروف تحولك لمتنمر عشان تاخد حقك منه علي حساب غيره. 

_وحساب غيره ليه، ما اتنمر عليه هو، دا حتي شبه.. 

لأ لأ مينفعش يا باشا. 

_ليه إن شاء الله؟! 

ببساطه لأن الكلمه الطيبة صدقه.