كتبت: نورهان مسعد
في مفاهيم غلط كتير من الطلاب بيمشوا عليها وهو مفهوم " كليات القمة" بغض النظر عن ميولك و شغفك ، بمعنى انك تخش كلية انت مش حاببها بس داخلها عشان مجموعك كبير و ضغط اهلك و الناس عليك كبير و ده غلط لان ساعتها هتخش الكلية و مش هتبقى ناجح فيها و هتتعب فيها اوي و بعد ما تتخرج مش هتبقى ناجح في مجالك ولا هتعرف تطور من نفسك فيه لأن ببساطة انت مش بتحبه اساسًا .
تاني حاجة لازم تبعد عنها انك متسألش هو المجال دا سهل ولا صعب، لان دا بيختلف من شخص للتاني فمحدش هيفيدك في النقطة دي بالعكس دا هيشتت تفكيرك اكتر.
تالت غلطة وهي انك تسأل حد انت بتثق فيه ادخل كلية ايه؛ لان ممكن مجال الشخص دا ميكونش مناسب ليك كل اللي عليك انك تسأل الدفعات اللي اكبر منك ايه مميزات و عيوب الكلية اللي هو فيها وعلى أساس المعلومات اللي انت عرفتها تختار اللي يناسب ميولك .
طيب ازاي اختار الكلية المناسبة ليا؟!
اول حاجة كل اللي عليك انك تقعد لوحدك و دي اهم حاجة متخليش حد يأثر على افكارك و قراراتك و بعدين هتجيب ورقة وقلم وتكتب فيها ايه المجالات اللي انت بتحبها وعندك شغف أن انت تتعلمها ، ايه الحاجات اللي انت شاطر فيها و عايز تتطورها.
تاني حاجة اكتب كل الكليات اللي مجموعك يسمح بدخولها، بعد كدا جمع مميزات و عيوب الكليات اللي موجودة في القائمة بتاعتك شوف ايه فرص العمل بتاعتها هل تتناسب معاك ولا لا، ممكن تجيب المعلومات دي من على النت أو خريجين الكليات دي.
و في النهاية لازم تفهموا نقطة مهمة اوي وهي ان الثانوية العامة مش نهاية المطاف انت يدوبك لسة هتبتدي حياتك ايًا كان الكلية اللي انت هتدخلها مدام حبيتها و طورت نفسك فيها يبقى هتنجح فيها
لانك لو اتخرجت و اكتفيت بدراسة الكلية بس و بالشهادة ف صدقني هتعاني عشان تلاقي شغل فلازم في سنين الدراسة بتاعة الكلية تطور من نفسك و تفهم اكتر و تتعمق في مجالك عشان تبقى ناجح.
و اخيراً لو كان نفسك في كلية و مدخلتهاش خليك عارف إن " خيرة الله خير من آمانينا♥️"
تعليقات
إرسال تعليق